أفضفض لمين !!!!!!!!!!!!!!

الحلم الرابع (( كان نفسى أتكلم مع حد !!!! ))

من حق كل واحد مننا انه يكون له صدر حنين وقلب قريب وحد يكون قلبه عليه يحكيله ويتكلم ليه يفضفضله باللى جواه ممكن يكون الحد دا ماما ولا أختى ولا حتى صاحبتى او بنت خالتى المهم انى اتكلم اطلع اللى جوايا وأرتاح !!

كان نفسى اسمع صوت عقلى مع حد يحبنى وينصحنى حد يكون عنده خبره عنى يفيدنى ويقف جانبى لكن للأسف مكنش حد معايا كنت وحيده عايشه وسط ناس كتيره بس مش سعيده مش لاقيه نفسى ومش شايفه حلمى ومش فاهمه امشى ازاى وأعدى!!!

يمكن تكون غريبه كتير منكم هيقولى طيب فين مامتك ماهى الاقرب لقلبك هقولكم متستغربوش أمى عنى بعيده وبعقلها الزايد ومشاعرها عنيده خايفه تقرب منى احسن دا يكون ضعف لشخصيتها وسلطتها أوغلط فى حق ابويا اللى هوا عشرتها وراجل بيتها:؛(

هههههه ومن همى بضحك ومن عقلى بهرب لدنيا لوحدى بدور فيها على حد يساعدنى انى احقق حلمىوألاقى نفسى والدنيا بتشيلنى وبأديها بتاخدنى وتودينى وتجيبنى ساعات بقفد سيطرتى أغلط ودا من حقى لكن كنت محتاجه حد يساعدنى يقولى ويفهمنى مش بس يعاقبنى يا كل بنت مسيرها تبقى أم اوعى تنسى انك هتكونى أم لازم تقربى من بنتك تسيبيها تحكيلك وعن همومها تشكيلك وعن أحلمها تقولك وترويلك لازم تكونى قريبه منها لازم تكونى صاحبتها علشان مش تفقد سيطرتها وتدور على حد حنين بره بيتها

ياااااه حلم صعب تحقيقه دلوقتى أنا عارفه لكن حكيته زى ما اتمنيته علشان دلوقتى صعب أتكلم مع حد غير نفسى لأنى للاسف

ما اتعودتش غير انى أفضفض ليها أحكيلها ,ارتاح فيها !!!!!!!!!!